Əbdül ata ocağı
Zəngəzur mahalı Meğri rayonundakı Nüvədi kəndində.
Nüvədi kəndinin adı 19.04.1991-ci ildə dəyişdirilərək Nonadzor adlandırılıb.
Memarlıq
Azərbaycanlıların 1991-ci il avqustun 8-də tarixi-etnik torpaqlarından deportasiya olunmasından sonra, Ermənistan dövləti tərəfindən ocağı ziyarət etməyə imkan verilməyib və ocaq ərazisi ermənilər tərəfindən dağıdılıb, xarabaya çevrilib.
Nüvədi kəndi yaxınlığından axan Sələnc çayının axdığı dərə boyu qoynundakı dağlıq hissədəki təpəlik yerdə əhali tərəfindən müqəddəs hesab olunan “Əbdül Ata” ocağı yerləşirdi. Pirin ətrafı gur və sıx ardıc ağacların olduğu meşəlik idi. Bu və digər müqəddəs ziyarətgahın olduğu yerlərdəki ağacları kəsmək günah sayıldığı üçün insanlar o ağaclara toxunmazdı. Deyilənlərə görə Nüvədi kəndində yaşayan və ana xəttinə görə imam Museyi-Kazımın nəslindən sayılan Seyid Mir Hüseyn Ağa (1885-1956) Təbriz şəhərində dini təhsil almış, kənddə dini-irfan el məclislərini idarə edərdi. O, ağaclara sitayiş etməyin islami dəyərlərlə bir araya sığmadığını sübut etmək üçün pir ətrafındakı ağaclardan kəsib, evində dirək və odun tədarükü üçün istifadə edib. Bu əməlindən sonra təqiblərə məruz qalan Seyid Mir Hüseyn Ağa 1937-ci ildə qardaşı Mir Rəsul Ağa ilə birlikdə kəndi tərk edərək Cənubi Azərbaycanın Misən kəndinə köçüb. Məzarı həmin ərazidədir [i], [ii].
Ocaq sakral-ruhsal duyğular məbədgahı idi. Ona pənah gətirən insanların niyyət edib, nəzir dediyi ümid mənbəyi sayılırdı
[i] Olaylar. – 2019. – 24-25 oktyabr, №141. – S.12.
[ii] Ermənistan azərbaycanlılarının tarixi coğrafiyası / Tərt. ed. S.Əsədov; elmi red.: B.Budaqov, Q.Qeybullayev. – Bakı: Gənclik, 1995. – S. 154.